ତ୍ରୈମାସିକ ଓଡ଼ିଆସାହିତ୍ୟ ଇ-ପତ୍ରିକା

ଚଳନ୍ତି ସମୟସ୍ରୋତରେ ମାନବଜୀବନ ହୋଇପଡ଼ିଛି ବ୍ୟସ୍ତବହୁଳ । ଜୀବନର ଲକ୍ଷ୍ୟ ଓ ଉଦ୍ଦେଶ୍ୟ ପୂର୍ଣ୍ଣକରିବାକୁ ସେ ଜୀବିକା ଅବଲମ୍ବନରେ ରହୁଛି ରତ । କର୍ମକ୍ଳାନ୍ତିର ଉପଶମରେ ଖୋଜେ ଟିକିଏ ଶାନ୍ତି ସନ୍ତୋଷ, ମନନ ଚିନ୍ତନ କରେ ଅଗ୍ରଗାମୀ ହେବାକୁ... ନିଜର ସ୍ଥିତି, ସୁରକ୍ଷା ବଜାଇ ରଖି , ପାରିବାରିକ ଓ ସାମାଜିକ କ୍ଷେତ୍ରରେ ଏକ ପରିଚୟ ସୃଷ୍ଟି କରିବା ପାଇଁ ସଦା ଚେଷ୍ଟିତ । ସାହିତ୍ୟ ହିଁ ଜୀବନକୁ କରେ ସରସ, ସୁନ୍ଦର ଓ ମଧୁମୟ । କବି, ଲେଖକ, ଲେଖିକାମାନେ ଚାହାଁନ୍ତି ତାଙ୍କର "ନବସୃଜନ"ର ଭାବ, ଭାଷା ସାହିତ୍ୟାନୁରାଗୀ ପାଠକପାଠିକାମାନଙ୍କ ନିକଟରେ ପହଞ୍ଚୁ , ତାଙ୍କର ହୃଦୟକୁ ସ୍ପର୍ଶକରୁ, ତଥା ତାଙ୍କୁ ସାହିତ୍ୟ ମନସ୍କ କରୁ, କବିପ୍ରାଣର ତଲ୍ଲୀନଭାବ ବିଶେଷାର୍ଥ... ଆଣିଦିଏ ସକରାତ୍ମକ ପରିବର୍ତ୍ତନ । ସହୃଦୟ ପାଠକପାଠିକାଟିଏ ପ୍ରାୟତଃ ଅଧିକାଂଶ ସମୟ ଭ୍ରାମ୍ୟମାଣ ଦୂରାଭାଷ ଯନ୍ତ୍ର ସହିତ ଓତଃପ୍ରୋତଭାବେ ପ୍ରତ୍ୟକ୍ଷ ନିୟନ୍ତ୍ରଣରେ ରହୁଛି ତଥା ସାମାଜିକ ଗଣମାଧ୍ୟମରେ ପଠନ, ଦୃଶ୍ୟ, ଶ୍ରାବ୍ୟର ଉପାଦେୟ ଉପସ୍ଥାପନାକୁ ଉପଭୋଗ କରି ମନୋରଞ୍ଜନ କରୁଛି ଓ ଜୀବନର ରାହାଟିଏ ଖୋଜି ଆଗକୁ ଯିବା ନିମିତ୍ତ ପ୍ରଯତ୍ନବାନ୍ । ଏହି ଆଭିମୁଖ୍ୟର ବିଚାରଧାରାର ଆଧାରରେ "ନବସୃଜନ" ଓଡ଼ିଆସାହିତ୍ୟ ଇ -ପତ୍ରିକା ପ୍ରକାଶକରିବାକୁ ହୃଦୟରେ ଜାତ ହୁଏ ଅସରନ୍ତି କଳ୍ପନା ଓ ମନର ଆବେଗତା ସଦା ହୋଇଥାଏ ଧାବମାନ ସାହିତ୍ୟର ଦୂର ଦିଗ୍ ବଳୟ ଅଭିମୁଖେ, ତତ୍ ସମେତ ଲୋଡେ ଆତ୍ମୀୟତାର ନିର୍ବିକାର ସ୍ବଚ୍ଛ ଭାବନା, ବିନିମୟ କରିବାକୁ ସ୍ଥୂଳରୁ ସୂକ୍ଷ୍ମ ଏବଂ ଭୂମିରୁ ଭୂମା ପର୍ଯ୍ୟନ୍ତ । ଆଶାର ଅସୁମାରୀ କଳ୍ପନା ଲୋଡେ ସଦା ସମସ୍ତ ସାହିତ୍ୟାନୁରାଗୀ ପାଠକପାଠିକାମାନଙ୍କର ସହଯୋଗ, ଶ୍ରଦ୍ଧା ଏବଂ ଅତୁଟ ବିଶ୍ୱାସ ।